«О́ner barysy» týrnırin ótkizýge ónerdiń aınalasynda júrgen jastardyń ózi bastama kótergen bolatyn. Ásirese, oblystyq qazaq drama teatrynyń Tólendi Álqojın bastaǵan jas akterleri belsendilik tanytty. Olardyń bastamasyn oblystyq Mádenıet, Sport basqarmalary jáne «Derek» qoǵamdyq qory qoldap, týrnır uıymdastyryldy.
О́nerdegi jastar «О́ner barysy» týrnırin oblystyq «Kostanaıskıe novostı» gazetiniń «Jızn na ladonı» jobasymen birigip, qaıyrymdylyq sharasyna aınaldyrdy. Týrnırden túsken qarjy Jangeldın aýdanyndaǵy Aqerke Jeksenbaı atty 8 jasar qyzǵa zamanaýı estý apparatyn satyp alýǵa jumsalady.
Týrnırge oblys óńirindegi 20-40 jas aralyǵyndaǵy ánshi, kúıshi, jyrshy, mádenıet qyzmetkerleri jáne asaba bolyp júrgen 32 ónerpaz jigit qatysty. Sonymen, bozkilemge shyqqan áýesqoı balýandar túrli salmaq dárejesi boıynsha kúsh synasty. Týrnırdi naǵyz búginginiń sal-serileri arasynda ótken doda boldy desek te jarastyndaı.
Eki topqa bólinip beldesken balýandar arasynda 65 keliden joǵary salmaqta Talǵat Álqoja birinshi oryndy jeńip aldy. Ekinshi oryndy Qalybek Álı enshiledi. Úshinshi orynǵa Dastan Bekov jaıǵasty. Al aýyr salmaqta beldesken top arasynan Erlan Qasymov sýyrylyp alǵa shyǵyp, «О́ner barysy» beldigin jeńip aldy. Erkebulan Qurmetov tıisinshe ekinshi oryndy enshilese, Baǵdat Nurmuhambetov júlde kómbesiniń úshinshi satysyna kóterildi.
«Rýhanı jańǵyrý» degenimiz eskertkish ornatý, ıá bolmasa aǵash egý emes, ol sananyń jańǵyrýy. Búgingi týrnır osyndaı maqsatta uıymdastyrylǵanyn aıta ketý kerek. Jobany qolǵa alǵan Tólendi Álqojın tárizdi azamattar aramyzda kóp bolǵaı. Sonda ǵana, ulttyq óner, ulttyq sport damıtyn bolady» dedi týrnırdiń saltanatty marapattaý rásiminde oblystyq mádenıet basqarmasynyń basshysy Erlan Qalmaqov.
Aıtpaqshy, «О́ner barysyn» qoldaýǵa Almatydan Serikbolsyn Kishkenbaev pen Ernar Sadyrbaı tárizdi jas estrada juldyzdary kelip, jankúıerler aldynda óner kórsetti. Osylaısha, olar da kishkentaı Aqerkeni qoldaýǵa shama-sharyqtarynsha óz úlesterin qosty.
Názıra Járimbet,
«Egemen Qazaqstan»
Qostanaı